Yangiliklar

Andijonda parrandachilik sohasida 10 million dollarlik yangi loyihalar ishga tushiriladi

Prezident Shavkat Mirziyoyev Andijon viloyatiga tashrifi chog‘ida Baliqchi tumanidagi "Sokin savdo servis" parrandachilik klasteri faoliyati bilan tanishdi.

Parranda go‘shti o‘zining parhez xususiyatlari va arzon narxi tufayli aholi ratsionida muhim o‘rin tutadi. Shu munosabat bilan O‘zbekistonda yirik parrandachilik komplekslarini yaratish, ishlab chiqarishni mahalliylashtirish va bozorni sifatli mahsulot bilan ta’minlashga alohida e’tibor qaratilmoqda. 2010 yilda tashkil etilgan "Sokin savdo servis" korxonasi bugungi kunda Andijon viloyatidagi 5 ta parrandachilik xo‘jaligi va Namangan viloyatidagi 3 tasini birlashtiradi, ular uchun yem-xashak esa Toshkent viloyatidagi zavodda ishlab chiqariladi.

Klasterda ishlab chiqarishning to‘liq sikli yo‘lga qo‘yilgan bo‘lib, u yem ishlab chiqarish, parrandani boqish, so‘yish, qayta ishlash, qadoqlash va tayyor mahsulotni iste’molchilarga yetkazib berishni qamrab oladi. Loyihaning umumiy qiymati 29 million dollarni tashkil etadi, korxonada 417 ta ish o‘rni yaratilgan. Ayni paytda bu yerda 1,5 million dona broyler jo‘jalari boqilmoqda. Ishlab chiqarish quvvatlari yiliga 8,2 million broyler yetishtirish va 20,6 ming tonna parranda go‘shti ishlab chiqarish imkonini beradi. Kompleks yiliga "Halal", HACCP va ISO standartlari bo‘yicha 55 ming tonna tovuq go‘shti va yarim tayyor mahsulotlarni qayta ishlashga qodir.

Joriy yil boshidan klasterda naslchilik yo‘nalishi rivojlantirilmoqda: 25 ming bosh tuxumchi tovuqdan iborat podadan yiliga 9 million tuxumdan 7,6 million broyler jo‘jasi olish rejalashtirilgan. 2027 yil oxirigacha korxonada chiqindilarni qayta ishlash liniyasi ishga tushiriladi va parrandalarni ko‘p qavatli katakli saqlash tizimi joriy etiladi, bu maqsadlarga 10 million dollar yo‘naltiriladi. Bundan tashqari, faoliyati to‘xtab qolgan va qiyinchilikka duch kelayotgan xo‘jaliklarni yagona kooperatsiya tizimiga birlashtirish taklif etildi, bu esa 350 dan 400 tagacha ish o‘rnini tiklash va qo‘shimcha 1,7 million bosh parranda yetishtirish imkonini beradi.

Manba