Yangiliklar
O‘zbekiston urug‘chilik va ko‘chatchilikni rivojlantirishga 200 million dollarlik sarmoya jalb qiladi
O‘zbekiston qishloq xo‘jaligida samaradorlikni oshirish, bozor mexanizmlarini joriy etishga qaratilgan keng ko‘lamli islohotlar davom etmoqda. Ilg‘or qishloq xo‘jaligi texnologiyalari, zamonaviy ilm-fan yutuqlari faol o‘zlashtirilmoqda.
Yaqinda bir guruh o‘zbekistonlik mutaxassislar Xitoy, Italiya, Yaponiyada bo‘lib, yetakchi ilmiy institutlar, yirik qishloq xo‘jaligi kompaniyalari va fermer xo‘jaliklari tajribasini o‘rgandi. Olingan bilimlar asosida hamkorlikning yangi rejalari ishlab chiqildi.
Hosildorlikni oshirishning asosiy omillaridan biri sifatli urug‘chilikdir. Xitoy qishloq xo‘jaligi akademiyasi naslchilik va ko‘chatchilikda katta tajribaga ega. O‘zbekistonda 14 ilmiy-tadqiqot instituti va 55 urug‘chilik xo‘jaligi mavjud, biroq yangi navlarni o‘zlashtirish va ilg‘or agrotexnologiyalarni qo‘llashda jiddiy kamchiliklar saqlanib qolmoqda. Mahalliy urug‘lik unumdorligi yo‘qligi sababli fermerlar xorij navlarini afzal ko‘rmoqda.
Bu borada Yuqorichirchiq tumanidagi Qishloq xo‘jaligiga xizmat ko‘rsatish markazi negizida Xitoy tajribasini hisobga olgan holda zamonaviy urug‘chilik va ko‘chatchilik tizimini tashkil etish ko‘zda tutilgan. Loyihaga 200 million dollar sarmoya kiritiladi. Mamlakatda paxta, g‘alla, sholi, makkajo‘xori, uzum va mevali ekinlarning yangi navlarini yetishtirish yo‘lga qo‘yiladi. Ko‘chat yetishtirish va uni ekishdan tortib, zamonaviy texnologiyalar va dronlardan foydalangan holda o‘simliklarni himoya qilish, hosilni yig‘ib olish va keyinchalik qayta ishlashgacha bo‘lgan butun o‘stirish siklini qamrab oluvchi namunaviy maydon yaratiladi.
Yana bir muhim yo‘nalish – malakali kadrlar tayyorlash. Bu borada Italiya tajribasi alohida qiziqish uyg'otadi. Masalan, Boloniya universiteti Yevropa qishloq xo‘jaligi sohasi uchun mutaxassislar tayyorlashda muhim rol o‘ynaydi. Italiya ilmiy institutlari qishloq xo‘jaligi ekinlarining yangi serhosil navlarini ishlab chiqish va tijoratlashtirish, biznes bilan faol hamkorlik qilmoqda.
Joriy yilda 200 nafar yosh mutaxassisni Boloniya, Tussiya, Ferrara va Piza universitetlariga ilg‘or texnikalarni o‘rganish uchun yuborish rejalashtirilgan. Tushiya universiteti har yili oziq-ovqat texnologiyalari sohasida 30 nafar mutaxassisni tayyorlash uchun grantlar ajratishga hamda bevosita O‘zbekistonda kadrlar tayyorlashda yordam berishga tayyorligini bildirdi.
O'quv va amaliy ishlarni birlashtirgan dasturlar butun dunyoda muvaffaqiyatli qo'llaniladi. O‘tgan yili Samarqand agrar instituti va Xalqaro qishloq xo‘jaligi universiteti hamkorligida bir guruh talabalar Germaniya va Buyuk Britaniyaga amaliyot o‘tashga yuborildi. Talabalarni Yaponiyada amaliyot o‘tashga tayyorlash maqsadida Toshkent davlat agrar universiteti, Xalqaro qishloq xo‘jaligi universiteti va Farg‘ona oziq-ovqat sanoati institutida yapon tilini o‘rganish markazlari tashkil etilmoqda.
Prezident ilgari surilgan tashabbuslarni qo‘llab-quvvatladi va agrosanoat tarmog‘i rivojlangan Vengriya, Niderlandiya, Kanada, Avstraliya, Janubiy Koreya kabi davlatlar bilan hamkorlikni kengaytirish muhimligini ta’kidladi. Qishloq xo‘jaligi vazirligiga hududlarda innovatsion loyihalarni ko‘paytirish dasturini ishlab chiqish topshirildi.
Manba
Axborot ko`magi
